صنع في السعودية، مبادرة من هيئة الصّادرات السعودية، تعزز الصّناعات السعودية وتحتفي فيها وتنمّيها، واسم "صنع في السعودية" اسم يحسسك بالفخر كسعودي وفعل مبني على النجاحات..

النّجاحات اللي تنصنع من أيدي سعودية ومن علامات تجارية سعودية.
باليوم الوطني السعودي91  صوت الصّناعات السّعودية كان لازم يسمّع ويعبّر عن هويّة وأهميّة الصّناعات السعوديّة، وعلشان زخم الإعلانات وزحمة الحملات باليوم الوطني حبينا نميّز الحملة بنفس مختلف، باستراتيجية اتصاليّة ترتكز على الصّادرات السعوديّة

حلّلنا مئات الإعلانات باليوم الوطني ببحث مفصّل على مدى ست سنين استنتجنا من خلاله أن الكل باليوم الوطني يحتفي بالمحليّة .. طيّب ماذا عن العالمية؟

ومن هنا بنينا الاستراتيجية بتحليل رباعي يبدأ من المشكلة ويوصل للحل الاستراتيجي وكمّلنا الاستراتيجية برسالة اتصالية قوية مفادها: وقف تفكر محلي .. خلّك عالمي

قلنا فيها حنّا كسعوديين من 90 سنة نكرر نفط .. مو صعب علينا نكرر نجاحاتنا

من الرسالة الاتصالية رحنا لمرحلة التخطيط، خططنا للحملة ودرسنا عامل الوقت، لأن الوقت يفرق بحملات اليوم الوطني، وعلشان نميّز الحملة ونحقق الفرق..

 طلعنا من حدود الوقت وخلّينا الحملة تمتد لما بعد الحملة، تمتد شهر قدّام، بتفعيلات واسعة تحث صنّاع النجاح من الصناعات السعودية على تكرير النجاحات في كل القطاعات

وخذينا استراتيجيّة الحملة من الورق إلى التنفيذ والواقع، بدينا بأوّل أداة اتصّالية وهي فيديو الحملة واللي قلنا فيه:

من لحظة اكتشاف النفط ونحن نكرره..

ليه ما نكرر شيء ثاني؟

نكرر نجاحاتنا!

قلنا بالفيديو الرّئيسي خلّك حديد صامد ما تحيد، وانطلق من أرضنا لأرضهم، وصّل لهم ثقافتنا وحاضرنا ومستقبلنا وصناعاتنا، خلّهم يجرّبون كل شيء سعودي، لا تحدّك حدود وفالك العالميّة!

فيديو الحملة كان جزء ما يتجزّأ من استراتيجيّة اتّصالية متعوب عليها، حلّلنا فيه واقع إعلانات اليوم الوطني والتوجّهات اللي فيها، توقيتها، كثرتها، أفكارها، أنواعها والمواضيع اللي تتناولها..

وكان من أبرز مخرجات الاستراتيجية تموضع "صنع في السّعودية" كشركة سعوديّة تحتفي بالصّناعات السعوديّة وتدعمها في السعوديّة وخارج السعوديّة وتحفزّهم على التصدير

اللي ساهم في إنجاح الحملة واستراتيجيتها، تعاون صنّاع النّجاح من الشّركات السعوديّة مع "صنع في السعودية"، واللي قلنا لهم رسالتنا وشاركونا بإيصالها بلغتهم، قلنا يا خطوة جمل ذوقوهم قهوتنا السّعودية، قلنا يا تمور المملكة قولوا للعالم إقدعوا، قلنا للمحولات السعوديّة وحديد الرّاجحي حولّوا شكل الصّناعات السعوديّة وصدّروها، قلنا يا هرفي ويالمراعي أكلوهم وشرّبوهم بمدارسهم وبيوتهم، وقلنا يا عبدالصمد القرشي عطّروهم من أطياب السّعودية

وقلنا لكل السّعوديين خلّونا نصدّر صناعاتنا للعالم وبيد وحدة خلونا نكرّر نجاحاتنا

نكرر نجاحاتنا أثّرت وسمّعت، وصنع في السعودية وقفوا ترويج للحملة وروجوا للمشاركين من صنّاع النجاح والجهات المشاركة، واسم صنع في السعودية وصل صداه باليوم الوطني وبعد اليوم الوطني والمخرجات كانت خير دليل

نكرر نجاحاتنا كانت نتاج استراتيجية إبداعية مفصّلة ومتعوب عليها، خذت الحملة لبعد ثاني وطال عمر الحملة وطالت لستة نجاحاتها